Eidg. Hornusserfest Walkringen - A

Zum üse Mannschaftsfüehrer zitiere: Üsi Schlagleistig am Uftaktspiu gäge HG Schmidigen am Eidgenössische Hornusserfest in Walkringen isch nahezue beschämend gsi! Zwar isch konstante Gägewind gsi und d' Nousse si nid vergäbe gfloge, aber wasmer am Bock zeigt hei isch würklech schwach gsi. Viu Eistelligi oder Fäuhstriche hei derzue gfüehrt, dasmer nachem erste Spiiutag nidemau 900 Punkt gschlage hei, nämlech 879 Punkt. Immerhin simer im Riis ohni Nummero blibe und dr' erwartet Räge het ounid ihgsetzt. Ufder Rangliste heimernis uf Riis 14 im Usstich gäge d' HG Mützlenberg-Nesselgraben widergfunge, de chunts auso wider zumne Derby amne Hornusserfest.

Am Samstig heimer de quasi z' Hornusse neu erfunge. Die meiste heisech dütlech chönne steigere und si dochno uf echli Punkt cho. Zwar immerno mit z' viune Fäuhstriche heimer de hüt no 960 Punkt gschlage, weme d' Wätterverhäutnis ahluegt wäre aber sicher ou 1'000 Punkt drinnegläge. Im Riis heimer wider eh sehr gueti Leistig chönne abrüefe, d' Nousse si früeh zeigt worde und souverän abdah worde.

Dank dene 0 Nummero und är Steigerig am Bock heimer de schlussendlech mit üsne 1'839 Punkt dochno 9 Mannschafte chönne hingernis lah und hei dr 25. Schlussrang ir 3. Stärkeklass beleit. Sicher eh Enttüschig, wemer luege wasmer eigendlech fürne Mannschaft gsteut hei und hätte chönne erreiche.

Bide Einzuschleger heisech numegrad Zwe chönne dr' Chranz lah ufsetze: Leuenberger Chlöisu mit sehr guete 142 Punkt uf Rang 24 und Langenegger Michu mit 130 Punkt uf Rang 82. D' Zwöituszeichnige heisech Althaus Svenu, Leuenberger Ädu, Aeberhard Lücu, Gurtner Yännu, Fankhauser Lücu u Leuenberger Ürsu ghout. Gratulation au dene!

Es grosses Danke geit ad' Organisatore und Dürefüehrende Mannschafte HG Bigenthal-Walkringen und HG Wäseli, wo das Fest ufd' Bei gsteut hei.

Anhornussen Freitag - 0 Nummero, 879 Punkte

Ausstich Samstag - 0 Nummero, 960 Punkte            

Total - 0 Nummero, 1'839 Punkte