Eidg. Hornusserfest Walkringen - B

D' B-Mannschaft isch am 17. Ougste gäge Mittag guet Glunt u Motiviert as Eidgenössische Hornusserfest nach Walkringen gfahre. Uf Ries 13 hei mir mit Zäziwiu-Rüttene C s' Ahornusse ustreit. Im erste Durchgang hei mir ä super Riesarbeit zeigt u mit viu Glück nur 1 Nummero müesse la schribe. Bim Schlah hets no nid so wöue. Nachdäm si mir no mau is Ries u hei dert no mau ä gueti Leistig zeigt, zwar hets no einisch äs Nummero gä, wo aber die letschte Zäziwiler hei gschlage het s' Wätter nümme Guet wöue mit üs, hets doch afah Donnerä u nachdäm wo mir gwächslet hei, hets afa Rägele, nachäm vierte Streich hets wi us Chüble afa schiffe u nacherä lengere Pouse isch d' Mäudig vom Obmann cho, dass nur Zwöi Ries zeue. Mir si froh gsi über dä Abbruch, so het nur 1 Nummero zeut u 283 Punkt. 

Während mir am Ässä si gsi isch uscho das mir am Samstig uf Ries 14 dörfe Bock setze u dr Usstich mit Wattewiu B müesse bestrite. Mir hei beschlosse dasmer dr Bock nachem Ässe no gö ga setze, dasmer nid am Samstigmorge weiss nid wie früeh müesse fahre. 

Am Samstigmorge si mir wieder guet glunet uf Waukringe gfahre u hei gwüsst: We mir no mau aus gä chönnts de sogar fürne Priis länge! Mir hei üs die erste Zwöi Ries chli chönne steigere bir Schlagleistig. Ou bim Abtue hei mir a di Leistig chönne ahschliesse wo mir am Fritig zeigt hei. Im 5. u 6. Ries hets no mau chli meh Pünkt gä. Leider heimer de aber im Riis no es Nummero müesse lah schribe. Aber über d' Leistig vo dene zwe Täg chöi mir z'friede si. 

Mir beände z' Eidgenössische Fest mit 2 Nummero u 894 Punkt ufem 23. Platz u hei zwe Chränz mitem Leuenberger Roger ufem 16. Rang u Hertig Simu ufem 44. Rang. Steck Marco het d' Zwöituszeichnig. Gratuliere a dene drei Manne. Danke ar ganze Mannschaft für öiie Ihsatz äs het ä jede brucht! Ä Dank geit ou a d' Eutere vo üsne Nachwuchshornussser sowie dene Giele säuber. Si hei im Riis u am Bock eh super Leistig zeigt! Danke Chrige fürs schribe, Svenu Merci für dini Ungerstützig. Wünsche Aune no aus Guete füre Rest vor Saison. 

Anhornussen Freitag - 1 Nummero, 283 Punkte

Ausstich Samstag - 1 Nummero, 611 Punkte

Total - 2 Nummero 894 Punkte