MS Bern-B. B - A

Nachder super Leistig vom B geits für d' A-Mannschaft am Namittag gägene herte Gägner los: Bern-Beundenfeld B. Z' Wätter blibt glich, einzige Ungerschiid das abem Mittag langsam d' Biise ufchunt - gueti Bedingige fürnes guets Schlagresultat. U das heimer wahrgno! 272 und 292 si die erste beide Riis gsi, auso scho im zwöite Meisterschaftsspiiu fasch es 300er Riis! Dä Bärner isches im Riis bis denn guet glüffe, heisi doch au chönne abdue. Bi üs isches genau glichguet glüffe, au heimer chönne abdue. Ei Schreckmoment isch de bim Stouffer Thömu cho, üsem aute Mitglied: 01 und de eh 23er, da chamesech vorsteuue wie das eis isch derhärcho! Burkhard Chrigu miteme starche Wurf het das Nummero chönne abwände! Gschlage heisi wäge viune 0 doch tatsächlech weniger wie mir, 25 Punkt simerne vor gsi. Auso nomau id Hose Manne. Und da heisech wider viu Fähler wie scho letst Saison ihgschliche. Vorauem vode TopSchleger si viu Fäuhstriche oder gar 0 cho, wasech ufd Punkt abzeichnet het. 256 und de no es 232 Riis. Gueti Usgangslag für d' Bärner, das Spiiu no z' chere. Und da heisi üs bewise, wassi chöi. 294 und 299 Riis heisi üs im 2. Umgang rund 100 Punkt abgno. Schad heimer nid a die Leistig vom erste Umgang chönne ahchnüpfe, wär weiss obs de sogar glängt hät. Trotzdem, mir si suber im Riis blibe und heinis 2 Punkt gägenes starchs Bern-Beundenfeld erkämpft.

HG Unterfrittenbach-Emmenmatt A: 0 Nummero, 1'052 Punkt

HG Bern-Beundenfeld B: 0 Nummero, 1'132 Punkt