MS Dürrenroth - A

Unbedingt Punkt hole, um ändlech vom Tabelleändi furt z'cho! Um das isches hüt bir A-Mannschaft gange, und da isches mitem direkte Tabellenachber Dürrenroth A nomau es wichtigers Spiiu gsi. D' Ahsprach vom Mannschaftsfüerer Leuenberger Chlöisu hetnis umso meh motiviert, hüt zu Höchstleistige ufz'fahre. Bi optimale Wind- und Wätterverhäutnis heimer das Spiiu hüt daheime im Längebach mitem Schlah ahgfange. Und da isches üs so guet glüffe wi nonie i dere Saison! Mite Riis vo 275 und 266 Punkt heimer schomau eh Marke gsetzt, wo jedoch vode Dürrenrother mit nume 5 Punkt Rückstand ihghout worde isch. Da beid Mannschafte eh suberi Riisarbeit zeigt hei (bi üs no miteme Schreckmoment, wo eh Nouss im 1 nid abdah z' Bode isch, aber zum Glück kaputt gsi isch), heimer das Spiiu am Bock müesse entscheide. Dasmau mit kem eistellige Nouss heimer 2 Top Riis usegschlage, 282 und 305 Punkt. D' Dürrerother ufder angere Site hei liecht abboue und schliesslech 1'060 Punkt gschlage. Mit üsne 4 super Riis simer schlussendlech uf 1'128 Punkt cho und hei ändlech eh starchi Reaktion uf die letste Spiiu zeigt und bewiise, dasmer sicher nid ah z' Tabelleändi ghöre!

Gratulation am Leuenberger Stöffu (22, 22, 21, 19 = 84) und Leuenberger Chlöisu (17, 21, 21, 19 = 78), wosech die 30 und 29 Rangpunkt ghout hei!

Spielliste Dürrenroth A