MS Dürrenroth - A

Dütlechi Niederlag vore dezimierte A-Mannschaft gäge Dürrenroth A.

Mit numegrad 15 Maa isch d' A-Mannschaft uf Dürrenroth az 4. Meisterschaftsspiu gfahre. Das hüt grad 3 Lüt fähle, hetsech ou ufd Stimmig vor Mannschaft usgwürkt. Nümme so motiviert u konzentriert wie die letste 3 Spiu simer ufträte. Im Riis isches wägem Wätter u Luft nid eifacher worde. Zum teil starche Wind het d' Flugbahn vode Nousse rächt beiihflusst. 90% vode Nousse si am linke Zili nah glüffe - u gäge Ändi vom erste Umgang isch de ufsmau eine am rächte Zili cho - und grad guet. Z' viu ufdi linki Site pokeret und de isch de Nouss viu z' spät gseh worde. Wasmer näre am Bock zeigt hei, isch schlicht u eifach eh katastrophe gsi! Ei Fäuhstrich nachem angere, viu schlächt troffeni Nousse - ke Konstanz. D' Dürrenrother hei es paar schnäui Striche müesse abdue, aber dr aueri letst Strich vomne Ersatz heisi de nümme chönne nä, eh schnäuue Nouss im 10ni isch unabdah z' Bode. Im Riis heimer de no eh solidi Arbeit zeigt und kene meh acheglah. Schad für das Nummero, im Riis simer mit 15 Mah grundsätzlech starch ufträte. Am Bock hetsech das Spiu vom erste Umgang bide meiste wiederhout. Immerhin heimer bim letzte Riis dochno 251 Punkt usegschlage. Eh bitteri Niederlag hüt fürs A, iz heissts umbedingt 4 Punkt hole bim nächste Spiiu gäge Mützlenberg-Nesselgraben A am 27. Mai am morge am 9i.

HG Unterfrittenbach-Emmenmatt A - 1 Nummero 828 Punkt

HG Dürrenroth A - 1 Nummero 919 Punkt