MS Häusernmoos - A

Z' hüttige Meisterschaftsspiiu gäge d' Häusernmooser isch spannend bis zum letste Maa blibe! Üse hüttig Gägner isch ir Meisterschaft 4 Punkt vor üs, drum muess unbedingt eh Siig häre! Ufem Blatt si d' Häusernmooser liecht im Vorteil, heisi i dene 6 Rundine bishär 400 Punkt meh gschlage. Aber mir si i Form, und das heimer aui gwüsst! Und drum simer däm Spiu mit viu Motivation entgägeträte. Und das hetsech uszeichnet: Mit 285 Punkt heimer es Top-Riis erziiut, und ou z' zwöite Riis mit paarne Fäuhstriche immerno 250 Punkt chöimer la zeuue. Üsem Gägner isches im erste Umgang nonid Rund glüffe, mit 251 und 227 heisi bereits 57 Punkt weniger gha aus mir. Beid Mannschafte no ohni Nummero geits für d' Heimmannschaft wider ah Bock. Leider heimer nümme ganz ar Leistig vom erste Umgang chönne ahchnüpfe, unger angerem wöumer ize ke Biise me, sondern eher Gägeluft hei gha - aber mite Riis 260 u 253, Totau 1'048 Punkt simer sicher sehr z'friede gsi! Nachem Wächsu het dr Luft erneut kehrt und es isch wider d' Biise gange. U die hei d' Häusernmooser usgnützt: Bereits 206 Punkt nach 12 Striche! Unger angerem 2x 23 - 2 Zili lenger aus dr' bishärig lengst Striich vom Spiu. Glücklecherwiis heisi die Punkt nid bis ändsuse chönne witerzieh und de het d' rächnerei scho vorem letste Schleger ahgfange. Mit 269 und 273 Punkt heisech d' Häusernmooser dütlech gsteigeret, hei aber dr' Rückstang usem erste Umgang nümme chönne ufhole und hei knapp mit 28 Zähler weniger verlore.

Üsi A-Mannschaft het ändlech ihres Potenzial chönne zeige und het das Spiiu dank 0 Nummero und are guete Schlagleistig chönne gwinne!

HG Unterfrittenbach-Emmenmatt A - 0 Nummero 1'048 Punkt

HG Häusernmoos - 0 Nummero 1'020 Punkt