MS Höchstetten B - A

Ligaerhaut mitere Top-Leistig erreicht!

D' A-Mannschaft het bim letste Meisterschaftsspiu vor Saison 2017 daheime gäge Höchstetten B dr Ligaerhaut us eigener Chraft wöuue erreiche, und isch somit gforderet gsi - und das Spiu sicher ou mitere gwüsse Nervosität ahgange, da mir immerno ufemne Abstiegsplatz gläge si. Aber die Nervosität isch z' ganze Spiu düre nie bemerkbar gsi, heimer doch trotz es paarne Fäuhstriche d' Riis 266 und 290 gschlage! Im Riis ischnis ou ideal glüffe und so het im 1. Umgang jede Nouss chönne abdah wärde, zudem heimer de Höchstetter nachde erste beide Riis bereits 51 Punkt abgnoh. Im 2. Umgang isches üs de no besser glüffe, dank sehr wenige Fäuhstriche heimer erneut 2 Top-Riis usegschlage - 277 u 300 Punkt: Total 1'133 Punkt. Somit isches üs klar gsi, wemer im letste Umgang jede Nouss abdüe, nämemer die 4 Punkt und schaffe dr Ligaerhaut. Mit grosser Ahspannig simer de nomau is Riis und hei aues gä. Das hets de gäge Schluss ou brucht! 2 schnäuui Nousse, wo grad vom gliche Spiler gschlage si worde, si beid vorem 10ni im Riis cho. Dank de starche Reaktione vom Fankhuser Lücu und Langenegger Michu hei de aber beid chönne abdah wärde. Umso grösser isch de ou d' Fröid gsi, wo ou dr letst Strich usserhaub vom Riis abdah worde isch und mir das wichtige letste Meisterschaftsspiiu gwunne hei!

Spielliste Höchstetten B

Nacheme schlechte Start mit viu Päch heimernis ide letste paar Spiu nomau chönne ufekämpfe und dütlech zeigt, das mir ou nächsts Jahr ir 1. Liga witerkämpfe wei!

Eh Dank weimer hie nograd ar Stöckli Tanja säge, wo praktisch jedes Spiu vor A-Mannschaft aus Schiedsrichterin begleitet het und viu Ihsatz zeigt het. Z' gliche giut für ds' Leuenberger Thesi, wo während viune Spiiu und Trainings d' Wirtschaft gfüehrt het.