MS Höchstetten B - A

Die 8. Meisterschaftsrundi het für d' A-Mannschaft hüt übere Gruppefavorit Höchstetten B gfüehrt. Z' Ziiu vo hüt si ganz klar die 2 Punkt usem Riis z' hole - dr' Räste wär de no eh schöni Zuegab. Pünktlech am 12i heimer das Spiiu im Riis ahgfange - und schnäu gmerkt, dases im Riis hüt eh schwiregi Sach chönnt wärde. Wouche, Sunne, Blau - im 10Minutetakt hei d' Sichtverhäutnis gänderet. Zumglück heise vorauem d' Manne hingeriih guet gseh und es hei auu chönne abdah wärde. Bim Wächsu heimer gwüsst, wasmer die letste 3 Jahr gäge Höchstette erreicht hei - 2 mau daheime heimer mit üner 1'100 Punkt gwunne, das isch hüt sicher ou z' Ziiu gsi. Aber bereits bim 3. Striich het es 3 gä, zeut natürlech nid viu. Derfür isch dr zwöit Striich suber gfloge bis i 18ner - und ungseh im Riis z' Bode! D' Ussicht nach 4 Punkt si da! Leider heisech am Bock de nomeh Fäuhstriche ihgschliche und es het d' Riis 217 u 256 gä. Rückstang bereits 80 Punkt. Im zwöite Umgang heimer im Riis nomau aues gä, dasmau si 2-3 schlächt troffeni Nousse cho, aber ou die hei chönne entschärft wärde. Nach 18 Mah heimer tatsächlech die 4 Punkt gäge Höchstetten B ghout! Super Manne! Am Bock heimernis nid chönne steigere, im Gägeteu. 22 und 236, beidi Riis nid optimau. Höchstetten het ou liecht nahglah, aber das Spiu mit 135 Punkt Vorsprung gwunne. Ohni die Fäuhstriche wär das für üs sicher ou drinegläge. Aber trotzdem: 4 wichtegi, unverhoffti Punkt gäge Höchstetten B!

HG Unterfrittenbach-Emmenmatt A - 0 Nummero 937 Punkt

HG Höchstetten B - 1 Nummero 1'072 Punkt