MS Oeschenb.-K. - A

Eh erneut gueti Leischtig vom A isch hüt leider nid belohnt worde.

Bi idealem Hornusserwätter het d' A-Mannschaft hüt daheime gägene starche Gägner ahgschlage, Oeschenbach-Kleindietwil A. Wie scho ide letschte beide Spiiu heimer erneut 2 starchi Riis chönne ahschla, 271 u 269. Im Riis hetnis üse Gägner scho fasch eh Machtdemonstration zeigt: Z' erste Riis mit 288 Punkt nonid ideal, heisi de bim zwöite Riis aues gä und 320 Punkt gschlage. Läng Striche, vorii hets nid viu z' düe gä - bis uf ei Nouss, wo im 8i acheisch aber zum Glück kaputtgschlage isch gsi. Auso mit 0 Nummero wider a Bock. Dert hetsech leider scho bim erste Schleger es 0 ihgschliche. Glücklecherwiis het das uf die meiste Schleger ke uswürkig gha und mir hei wider es guets 3. Riis chönne schla - 272 Punkt. Wis ahgfange het, hets ou ufghört: Bim 18. Schleger hets doch ounomau es 0 gä. Zämegrächnet heimer scho nume i dene 2 Striche 30 Punkt verlore, darum isch z' letschte Riis ou numeno 243 Punkt gsi. Mit dene 1'055 Punkt simer de nomau iz Riis. Dert ischsnis wider sehr guet glüffe, d' Nousse si zeigt und abdah worde. Bis zum 15. Schleger. Bis dato heter d' Striche 18, 19 u 20 gha. U de no es 6i. U genau das 6i isch de ou ache. Leider, wöuer eigendlech eh gradi Flugbahn gha het und hät abda wärde söue. Da d' Oeschenbacher nomau ufdräit hei und 326 u 282 Punkt hei gschlage, hei mir das Spiiu mit 0 Rangpunkt müesse beände.

Trotzdem muess gseit si dasmer momentan ire starche Form si, sowou im Riis wie ou am Bock. Trotz dere bittere Niederlag wärdemer nächst Sunntig gäge Dürrenroth sicher 4 Punkt ahgrife.

HG Unterfrittenbach-Emmenmatt A - 1 Nummero, 1'055 Punkt

HG Oeschenbach-Kleindietwil A: 0 Nummero, 1'216 Punkt