MS Rohrbach - A

Z' letschte Meisterschaftsspiiu isch für d' A-Mannschaft nümm gross entscheidend gsi, dr' Ligaerhaut isch bereits gsicheret gsi, trotzdem het gäge Rohrbach eh Siig härewöuue, zum eventuell no 1-2 Plätz ir Tabelle guetz'mache. Bi ideale Bedingige, starcher Biise und schönem Wätter hei mir gäge Rohrbach ahgschlage, eh Mannschaft womer ufem Papier guet sötte möge. Leider hets vorauem im zwöite Riis de scho mänge Fäuhstriich gä, und de hets ufgrund vode eigendlech guette Bedingige "nume" 260 u 244 Punkt gä. Vor Schlagleistig vode Rohrbacher simer de näre überrumplet worde! 259 u 284 Punkt heisi ahgschlage, ufgrund vode vorhärige Leistige hättemer das sicher nie erwartet. Im zwöite Umgang ischnis de sogar noschlechter glüffe! Nomeh Fäuhstriche, z' viu Eiistellig Striche, nume grad 235 u 258 Riis, z'wenig für die hüttige Bedingige. Leider muessme säge isch wägemne schlächt troffene Nouss im 1 vore eh Nouss unabdah z' Bode und d' Rohrbacher hei eh schwiregi Usgangslag gha, zum no dr' Abstiig z' verhindere. Am Bock heisisech nid la unger Druck bringe und hei nomau eh beachtlechi Schlagleistig zeigt, 274 u 245 Punkt. Da mir aber im Riis suber glibe si, heimer die 4 Punkt ghout und d' Rohrbacher numeno 1 Rangpunkt.

Leider isch bi üs nid unbedingt eh Verbesserig am Bock zeigt worde und mir hei dr' Trend usde letste Spiiu fortgfüehrt – Starch im Riis, schwach am Bock. Bis zum Eidgenössische müessemer das unbedingt ih Griff übercho und die vile Fäuhstriche usbessere, de wärdemer wider wie ahfangs Saison immer über 1'000 Punkt schlah, was sicher ou z' Ziiu wird si!

D' A-Mannschaft schliesst die Meisterschaft nacheme missglückte Meisterschaftsstart ufem 6. Schlussrang ab, schlussendlech hei numegrad 4 Punkt ufe Ufstiger Häusernmoos gfäuht! Die Meisterschaft isch sicher vo Päch und Glück prägt gsi, so heimer es paar Spiiu unglücklech verlore trotz are sehr guete Schlagleistig und einzelni Spiiu gwunne, obwoumer schlächt gschlage hei.

Es grosses Danke wetti im Name vor ganze A-Mannschaft üsem Hüttliteam, aune vorah ar Leuenberger Thesi usspräche, wo praktisch bi jedem Spiiu und Training für üs gsorgt het! Äbefaus üsne Schidsrichterinne, wonis ah jedes Spiu begleitet hei. Us letsts natürlech ou de vile B-Spiler, wo d' A-Mannschaft bi viune Spiiu tatchräftig ungerstützt hei!

 

HG Unterfrittenbach-Emmenmatt A – 0 Nummero 997 Punkt

HG Rohrbach – 1 Nummero 1'062 Punkt