MS Zollbrück - A

Eh Siig mues häre, unbedingt 4 Pünkt gäge direkt Tabellenachbar Zollbrück! Mit däm Ziiu simer hüt i Freudenhof uf Zollbrück az Dorfinterne Meisterschaftsspiu gfahre. Bi schönem Wätter und guete Windbedingige hei d' Zollbrücker ahgschlage. U da isches leider nume bis zum 9. Schleger gange, womer bereits es Nummero hei müesse la schribe. Dr Nouss isch spät gseh worde, sehr spät. So spät, dases bi üs gar eine ah Heum breicht het. Schad, wärer chli früehner gseh worde, wärer sicher ab. Chli nidergschlage heimer dä Umgang no suber chönne abschliesse. Am Bock heimer drfür wöuue überzüge. U das isch sicher glunge - mit 248 und 272 simer um 34 Punkt i füehrig gange. Was no derzue isch cho: Scho dr 8 Strich isch bide Zollbrücker im 17ner unabdah z' Bode - Heisst umbedingt die 2 Punkt heihole! Im Riis isch d' Motivation de wider zrugcho, es paar heikli Striche si im letste Moment no abdah worde. D' Zollbrücker hei z' Spiu de mit 968 Punkt beändet. Unbeihdruckt chöntme säge heimer am Bock de no eh super Leistig abgrüeft - mite Riis 262 u 276 (nume 3 eistellig Striche!) heimer üses Resultat nochli chönne ufpoliere und schliesslech 1'058 Punkt gschlage! Leider isch die Leistig wirder nid rächt belohnt worde, 2 wärtvouui Pünkt si erneut wäge 1 Strich verlore gange. Nächst Sunntig fingt de wider es Heimspiu statt, dasmau gägenes starchs Häusernmoos, wo momentan ou dütlech über 1'000 Punkt schlaht. Es spannends Spiu steitnis auso bevor!

HG Unterfrittenbach-Emmenmatt A - 1 Nummero 1'058 Punkt

HG Zollbrück - 1 Nummero 968 Punkt