Emment. Hornusserfest - A

Mitere chli veränderete A-Mannschaft (3 Usfäu wegen Hochzeit) het d' A-Mannschaft z' hüürige Emmentalische Hornusserfest Oschwand-Biembach bi ideale Wätterbedingige bestritte. Bereits im Ahhornusse am morge isch viu entschiede worde; bi schwirige Sichtverhäutnis hets sehr viu Nummero gä. Mit Ihsatz u am nötige Glück simer mit 0 Nummero usem Spiu use. Punktemässig simer sicher dütlech hinger üsne Erwartige blibe. Im Usstich gäge Thun A heimer im Ries keni Problem zeigt u das Fest mit 0 Nummero chönne beände! Ide Punkt heimer ou am Namittag nid chönne überzüge u äs si viu Fäuhstreiche gschlage worde. U so längts am Abe de füre verdient 5. Schlussrang u die Grossi Glogge! Super Manne!

Bide Einzuschleger loufts am Ädu Leuenberger (106 Punkt, 14. Schlussrang) u Märcu Muralt (103 Punkt, 19. Schlussrang) am beste u erziele beid ä Rangchranz! Die witere Chranzgwinner si Michu Langenegger (98) u Märcu Steck (95). Medaillengwinner si Lücu Fankhauser (89), Nändu Aeberhard (88), Hans Leuenberger (82), Töbu Hertig (81) u Yännu Wüthrich (79). Härzlechi Gratulation aune Chranz- u Medaillengwinner!

Nächst Sunntig spiut de d' A-Mannschaft bereits z' Interkantonale Hornusserfest Oschwand-Biembach ir 1. Stärkeklass uf Ries 7.