MS Wattenwil A - A-Mannschaft

Wär ä Blick ufd' Tabelle vor 1. Liga Gruppe 1 gworfe het wirds gmerkt ha: Für üsi A-Mannschaft isch hüt äs extrem wichtigs Spiu ufem Programm gstange: D' Frittematter lige mit 24 Punkt ufem 4. Zwüscherang - 2 Punkt hinger Wattenwil u Messen. U genau gäge d' Wattenwiler heimer z' hüttige Uswärtsspiu ustreit. Eh Sieg isch drum Pflicht gsi, weimernis witerhin im Ufstiegsrenne haute. Bi sehr warmem u sunnigem Wätter isches im Ries schwirig gsi, jederzit 100% z' gä. U wöu d' Wattenwiler äs extrem schnäus Spiu zeigt hei, ischme chuum zu Trinkpousene cho. U glich heimers gschafft, die meiste Nousse früech z' finge u das Spiu mit 0 Nummero z' beände. U ou am Bock heimer ah üsem Spiu vo letscht Wuche chönne ahchnüpfe; bi teils liechtem Gägewind heimer erneut es Top-Schlagresultat erziiut u üse Gägner um über 100 Punkt gschlage! Dank üsne Schlagpunkt rütschimer so ir Tabelle vor d' Wattenwiler. Da aber ou Messen 4 Punkt ghout het, befinge mir üs witerhin ufem 3. Zwüscherang u somit 2 Rangpunkt hingerem Ufstiegsplatz. Die letschti Rundi verspricht somit Spannig pur, spile doch d' HG Messen gäge d' HG Wattenwil z' letschte Spiu gägenang!

Chömit am Samstig, 1. Juli i Längebach u füürit üsi A-Mannschaft ah! 

Bide Einzuschleger erziiut erneut Svenu Althaus z' höchste Resultat (76) u cha si 3. Zwüscherang ir Einzuschlegertabelle verteidige! Ädu Leuenberger (73) u Märcu Muralt (71) wärde Zwöit u Dritt.

HG Unterfrittenbach-Emmenmatt A: 0 Nr. 981 Punkt / HG Wattenwil A: 0 Nr. 871 Punkt