Frühlingshornussen Stalden-Dorf - A

10.03.2019

Wär hüt am Früehligshornusse Zwöistellig gschlage het, isch sicher eine vode bessere gsi! Sturm Eberhard het z' hüttige Turnier in Konolfingen starch i Mitleideschaft zoge. Vode 12i ah hets de zersch eifach starch gluftet, wos de ums Schlah gange isch, isch derzue no starche Räge derzue cho. Da het sicher no so einige überleit gha, wiso daser hüt nid eifach im Bett blibe isch. Mit 21 Punkt i zwe Striche si dr' Steck Marco und Althaus Sven die sterchste gsi us üsere Mannschaft - und heis mit dene Resultat ir Rangliste uf Platz 13 u 17 gschafft - dr' Siiger het grademau 30 Punkt brucht für das Turnier hüt z' gwinne.

Erfröilech isch de erneut üsi Mannschaftsleistig gsi: Dank däm mir die einzigi Mannschaft ohni Nummero blibe si, heimer das Früehligshornusse in Stalden-Dorf nach letst Jahr us Tituverteidiger erneut chönne gwinne! Derzue heimer mit Hertig Tobias (01, 09 = Totau 10 Punkt) dr' best Nachwuchshornusser chönne steuue!

Iz het d' A-Mannschaft 3 Wuche Zyt, sich uf d' Saison 2019 vorz'bereite - am Samstig, 30. März geits de witer miter Meisterschaftsvorbereitig - Wettspiiu gäge d' HG Mülchi im Längenbach.