Emment. Hornusserfest Wasen - B

Z' Wätter meints hüt ändlech ou guet miter B-Mannschaft! Nach Duurräge am Interkantonale Hornusserfest vo letscht Wuche schiint hüt bereits vom morge ah d' Sunne. Was hüt aber eh immänse Nachteil isch gsi: Da d' Sunne vo vore gäge z' Ries gschune het, isches sehr schwirig gsi, d' Nousse z' finge. Und das hei viu Mannschafte z' gspüre übercho, so ou mir: Grad 9 Nousse hei ide erste beide Ries müesse ungerstriche wärde. Ou am Bock loufts de wenigste Rund, Gurtner Yännu mit 19, 17 schlaht mit Abstang am meiste vo üsne. Am Namittag im Usstich simer de ufem zwöitletsche Platz gläge, und obwou d' Sichtverhäutnis chli besser si worde, heimer - ou wäge Abduefähler - nomau 12 Nousse acheglah. Am Bock chönntme meine, die Nummero heignis Chraft verleiht: 188, 198, 200 u 147 = Totau 733 Punkt am Namittag > Was fürne Leischtig! Was de no viu erfröilecher isch: Gurtner Yännu cha ou am Namittag eh starchi Leischtig abrüefe und schalht mit 20, 19, 20, 17 = 76 Punkt am Namittag es super Resultat.

Dr' Oberhammer chunt de bir Usgab vode Ranglistene: Mit Totau 112 Punkt schaffts Gurtner Yännu ufe 3. Schlussrang und schaffts somit ufs' Podest! Geniau, waser i so churzer Zyt erreicht het, Härzlechi Gratulation am Yännu für die hammer Leischtig woner hüt zeigt het!

Us witere Chranzgwinner hetsech hüt zudem Hertig Simu chönne la chröne mit 86 Punkt. Zwöituszeichnige gwinne Althaus Björn (83), Baumgartner Bruno (81), Wüthrich Jakob (79) u Leuenberger Roger (77).