MS Dürrenroth - A

Nach 8 Punkt usde erschte zwöine Spiiu het d' A-Mannschaft gäge Dürrenroth sicher erneut wöuue eh Siig hole - und das gägene Gägner, womer sicher hei wöuue u müesse schlah! Aber es hetsech bereits im erschte Umgang es düüsters Biud zeigt! Bi teils starchem Gägewind heimer - vorauem im zwöite Riis - eh desolati Leischtig zeigt! Grademau 230 u 208 Punkt heimer gschlage. D' Dürrenrother ufder angere Site hei nid wesentlech besser da, trotzdem sisi mit 13 Punkt i füehrig gange. Im zwöite Umgang heimer de doch no chönne zeige, wasmer eigentlech chöi: 242 u 243 Punkt - u das bi Gägewind - längt schliesslech zu 923 Punkt. U womer im Riis si gsi, isch z' bange u zittere bereits nachde erschte Schleger losgange. Ou Dürrenroth zeigt im zwöite Umgang eh super Leischtig u muess bis zum letste Schleger no 22 Punkt hole. Dr' zwöitletst  Strich: es 8i! Iz heissts hoffe... Aber wo bereits früeh gmäudet wird, ungere Zieli nah, 16, heimer gwüsst, iz längts nümm.. Und tatsächlech, 16 - Dürrenroth gwinnt somit das extrem knappe Spiiu mit huuchdünnem Vorsprung vo 2 Punkt. Schad, d' Enttüschig isch sicher gross gsi, vorauem wöumer wüsse, dasmer eigentlech ou bi dene Verhäutnis vo hüt 1'000 Punkt chönnte schlah. Aber d' Chöpf nid la hange, mir hei immerhin us 3 Spiiu 12 Punkt ghout und lige zwüschezitlech ufem 5. Rang - mir kämpfe witer!

Beschte Einzuschleger wird - afang chli zum Standard worde - Althaus Svenu mit 69 Punkt und houtsech die 30 Rangpunkt!