MS Schmidigen - A

0 Nummero - 4-Punkte-Sieg - Ligaerhaut für d' A-Mannschaft!

Üsi gueti Usgangslag vom Meisterschaftsstart heimer die letste paar Spiiu vergä und so isches ou mit üs immer knepper worde gäge d' Abstiegsräng. Z' hüttige Spiiu het drum söue dr' vorzitig Ligaerhaut sichere. Und: Ziel erfüllt! Bi sehr schwirige Sichtverhäutnis hei hüt sicher beid Mannschafte Müeih gha, d' Nousse früech z' finge. Umso erstunlecher isches, das die einzige 2 Nousse wo - uf Site Schmidgen - acheglah si worde, no settig Streiche si gsi, wo gnue früech gseh si worde und eigendlech abdah hätte müesse wärde. D' Usgangslag isch für üs auso gleit gsi, hüt 4 Rangpunkt z' sichere. Dank are starche Riesleischtig und are Priise Glück (ei schnäuue Nouss het im 6i vo Gurtner Yannick chönne abdah wärde, ei 17ner isch im letschte Moment vo Tschabold Christian gseh und abdah worde) heimer de ou mit 0 Nummero vom Platz chönne. 

Am Bock isch hüt es hin- u här vom Luft gsi: Mau isch Biise cho, mau Gägeluft, mau isch Siteluft cho. Im erschte Umgang heimer de bi konstantem Gägeluft müesse ahschlah und de mit paarne Fäuhstreiche 473 Punkt gschlage. Üse Gägner het de bi bessere Bedingige 489 Punkt gschlage u isch liecht i Füehrig gange. Im zwöite Umgang heimer de üs ändlech mau chönne steigere und bi ou bessere Bedingige no 505 Punkt gschlage. Schmidige ufder angere Site het nahglah und no 476 Punkt gschlage. Heisst: Mit 978 Punkt zu 965 Punkt heimer gwunne!

Da fasch jedi Mannschaft i üsere Gruppe acheglah hei, heimer vo däm chönne profitiere und hüt, ei Rundi vor Schluss, dr' Ligaerhaut chönne sichere. Momentan ligimer ufem sehr guete 3. Rang, wasmer im letschte Spiiu gäge Bern-Beundenfeld B wei haute!

Höchst Einzuschleger wird - trotz amne 16ner - Svenu Althaus mit 74 Punkt > 30 Rangpunkt!

Unterfrittenbach-Emmenmatt A  0 Nr. / 978 Punkt

Schmidigen A   2 Nummero / 965 Punkt