Schlusshornussen 2023

Nachder gestrige Rangverkündigung vor Meisterschaft 2023 si dr Eint oder Anger A-Spieler hüt sicher körperlech nid ir beste Verfassig gsi - nüt desto trotz heimernis ufene Luschtige, Ungerhautsame Saisonabschluss bi üs im Längebach gfröit. Wie gwohnt si die beide Mannschafte mit Jasscharte usgloset worde u z' gwünschte Resultat isch vor Spiubeginn ahgseit worde. Nachdäm de die beide Spiulistene ersteut worde si (für die Listene heimer üs viu Zyt gno, heimer doch jedem Spieler ä müglechst träffende Spitzname für z' hüttige Spiu wöuue gä) heimer de pünktlech am 12i üses hüürige Schlusshornusse chönne starte. Das z' Ändi vor Saison naht isch de vorauem im Ries bemerkbar gsi - so heisech beidi Teams einigi Nummero müesse la schribe. Am Bock hets vode Resultat här keni grosse Überraschige gä, die bekannte Näme wie Svenu (Balbo) u Muralt Märcu (Brösmeli) si vorab gsi. Vorab, aber nid die Höchste: Rohr Michu (Eismeister) schlaht trotz amne 13er es starchs Restultat u wird mit 110 Punkt Tageshöchst!

Im Differänzle hets folgendi Sieger gä:

Nachwuchs: 1. Rang Kilian Hertig (40/46) / 2. Rang Rohr Raphael (10/3) / 3. Rang Weber Yves (69/77)

Aktiv: 1. Rang Althaus Niklaus (70/70) / 2. Rang Wüthrich Yannick (75/77) / 3. Rang Althaus Sven (110/107)

Es isch ä glungnige Saisonabschluss gsi wosech nomau aui Spieler*inne vor A- B- u Nachwuchsmannschaft troffe hei, zäme hei chönne hornusse u ahschliessend zäme es Z'Vieri u öbbis z' Trinke zäme hei chönne nä. Merci viumau ar Erika Hertig füre Hüttlidienst hüt u ou z' ganze Jahr düre - es isch jedesmau super organisiert u bewirtschaftet gsi.

Iz fröie mir üs no uf üses Lotto am 9. u 10. Dezember 2023 im Stärne Neumühli u verabschiede üs i wohlverdient Winterschlaf!