Stärkeklassenmeisterschaft 2021

23.08.2021

D' Stärkeklassemeisterschaft 2021 isch offizieu fertig. Bereits am vordere Wucheend het d' HG Unterfrittenbach-Emmenmatt A ihres letschte Spiu daheime gäge d' HG Gerlafingen-Zielebach B gha und chönne gwinne. Somit isch ou die spezieuui Saison verbi - z'mingst was z' Programm vom EHV us ahgeit. Im Herbst geits de nomau richtig los!

Die Stärkeklassmeisterschaft het bekanntlech mit 6 gäge 6 Mah ahgfange. I däm Modus si mir nie richtig warm glüffe u hei kes einzigs Spiu chönne gwinne. Und ou näre im normale Modus 16 gäge 16 isches nid viu besser witergange. Ersch die zwöi letschte Rundine hei mit je 4:0 gäge HG Recherswil-Kriegstetten B u äbe Gerlafingen-Zielebach B chönne gwunne wärde. Drfür hets denn ume richtig guet usgseh u mir hei us Mannschaft ändlech wider eis chönne zeige, wasmer chöi u si motiviert vo A bis Z gsi. 

Zwüschedüre isch no die Emmentalischi Gruppemeisterschaft z' Alchenstorf gsi. Keni vo üsne 3 Gruppene hets mit 0 Nummero düregschafft, si doch d' Sichtverhäutnis bi strahlend blauem Himmu sehr schwirig gsi. Trotzdem hets für die erschti Gruppe - dank "nume" 1 Nummero - de glich no für d' Medaille glängt.

Im Herbscht, ab ändi September, geits iz de nomau richtig los mit insgesamt 6 Spiu, wo no ufem Programm stöh. Afah duets am 26. September 2021 mitem Blasenfluhhornussen im Oberthal. 

D' HG Unterfrittenbach-Emmenmatt bedanktsech a dere Steu bi aune Sponsore, Bsuecher, freiwiuuige Häufer u vorauem ou aune Mitglieder, wo bi dere spezieuue Saison üse Verein i irgend äre Art ungerstütz hei. Mir fröienis, öich aui ou nächsts im Längenbach amene Spiu vor - hoffentlech de wider normale - Meisterschaft 2022 chönne z' begrüesse.