Wettspiel Mülchi - A

Bi ideale Wätter- u Windbedingige het d' A-Mannschaft hüt eigendlech wöuue d' Houptprob vorder Meisterschaft dürefüehre. Leider si grad 6 Spiler vor A-Mannschaft verhinderet gsi, drum chöimer das hüttige Spiu sicher nid us grossi Vorbereitig für d' Meisterschaft ahluege. Mit 16 Mah, drvo 4 B-Spiler. Nüt destotrotz heimer sicher aus wöuue gä und das Spiu gwinne. U das hetsech bereits nachde erschte 4 Schleger ufzeichnet: Bereits 4 vo 8 Streiche si bi üsem Gägner unabdah ufe Bode - und das hetsech dür z' ganze Spiiu dürezoge. Bis schliesslech 17 Nummero gheit si! Üs isches ufder angere Site dütlech besser gange, d' Nousse si gseh und gmäudet worde. Einzig 2 Streiche, wo chli schlächt troffe si cho, si de vor inne im 3 z' Bode. Ar Meisterschaft mitere vou bsetzte Truppe müessimer settegi Streiche de sicher abdue!

Am Bock isches de im Grosse u Ganze ou nid schlächt glüffe, einzelni A-Spiler hei hüt scho vougas chönne gä und überzügt. Weme rein dr' Durchschnitt vode A-Spiler ahluegt, heimer mitemne Schnitt vo 14.56 sicher scho eh gueti Leischtig chönne abrüefe. Die zwe höchste Frittebach-Ämmematter si hüt Svenu Althaus (rächts) u Lücu Aeberhard (links) mit je 72 Punkt gsi.